Jõulupalvõ 2011

Lisainfo
Avaldatud Pühapäev, 01 Jaanuar 2012 22:09

 

Sa, nägemäldä, kuuldmalda,

kink perält um riik, vägi ja avv,

ma rutta sullõ teedüst viimä,

et inemine um torrõn elutiatrin

hindä jumaligu henge n´arakudsõs näüdelnü,

tähti täüs taivalõ sällä püürdünü.

 

Ma pallõ sinnu alandligun avvustusõn:

kutsu inemine elutiatri püüne päält alla.

Lähädä timä latsõiä savvusanna

ja käse täl mõskõ puhtas

elumuatsõ käe nink varba,

tos´unõ süä ja kuri suu,

silmä pümme nink mudsu uinahtunu.

 

Puhtas mõstu inemine kata

esiimä pakladsõ hammõ ja lambanahka kaskaga,

pehme luntkübärä nink lämmide viltega,

hüvvi umatsidõ armu ja hellämisega.

Lasõ täl vana leeväahu paistusõn

juvva verevä lehmä värskit piimä,

süvvä kartliputru suurmidõga

nink kesväkaraskit palugasahvtiga.

 

Päält tuud säe valgõ hopõn saani ette,

polmi inemine vaaresä villadsõ teki sisse

ja las timä rändäs läbi lumitsidõ laani,

üle iätside  järvi nink jõki.

Sõs saa inemise heng vahtsõst jumaligus,

tiä helises kesk ikävruumi avarust

ja um prii torrõ elutiatri põllussist.

  

 

     Häniläne (Mariina Paesalu)