Open Source Content Management

Joba pall´u aastagid tagasi matt´ mu imä

su harulidse uibu ala,

sinnä pujengipindre viirde,

kon orjavits ja vabõrna.

Sullõ es tetä halõstusõpritsi,

sa suiksõ unõlõ ku mullakõnõ

uma asõmõ pääl

villadsõ teki all.

Ma tõi su kolmõkümne aastaga iist

koolisõsara käest,

hoiji sinnu tuvvõn katõ peo vahjõl

uma kaala man.

Mul um sust pall´u mälehtüisi,

külh kutsiga-, külh vana pini iäst:

kuis sa üle lillipindre

joosi naabri kassi perän,

kuis minnu haukmisõga tereti

ja takan ai linnokid,

ku olõssi nuu olnu suurõ hauka,

kiä kirevide kannu perrä tulli.

Aga kõgõ rohkõmb meelen um,

kuis üts päiv tarõ nukan

sa väikut handa keeruti

nink mullõ sõbra muudu otsa kai.

Ja tõnõkõrd kost kõrvu kavvõst aost,

kuis sa üüse immä takan iki.

Es mõista sõs sinnu kallistama minnä,

es tröösti su leinälist latsõhenge.

Häniläne (Marina Paesalu)