Viil üts külänkäük latsiaida sai teos timahava jürikuu 5. pääväl.
Kutsõ tulla umma kiilt ja kultuuri tutvustama sai mi selts Talina Sikupilli Latsiaialt. Kuuldusõ, et võrokõisi ülesastmisõ omma põnnõva kullõlda-kaia nii latsilõ ku oppajilõ, olli` müüdä latsiaidu lakja lännü. Võtsõmi kutsõ vasta ja Sikupilli latsiaian kävevä Müürsepä Külli, Toomla Silvi, Greenbaumi Thea, Keerma Katrin ja Orioni Jana.
Alostusõs tutvust Külli meid ja kõnõl Talina Võru Seldsist. Sõs laulsõmi seldsi hümni “Mu latsõpõlvõ Võromaa”, klavõril saatsõ Katrin.
Meil olli` tähtsä külänkäügi jaos sälgä pantu uma kandi uhkõ ja ilosa rahvarõiva. Sikupilli latsiaia latsõ näivä, määndse omma Urvastõ, Rõugõ, Vahtsõliina rõiva ja viil ka Eesti kõgõ vanõmba - Siksälä rõiva. Latsiaia hoovist kai meid läbi aknõ kah üts joonikadsõ undrukuga tegeläne, arvada et “majavaim” – korgõ puukand, kinkälõ olli silmä päähä ja undruk sälgä värmit.
Jana kõnõl latsilõ Võromaast: kost tuud löüdä kaardi pääl, määne om Võromaa lipp, midä põnnõvat Võromaal tetäs läbi aasta ja midä om sääl kaemisõ väärilist löüdä. Är nimmätü saiva Pokumaa ja Tammõ-Lauri tamm, Suur Munamägi ja Paganamaa. Tetäs kah Võromaal pallo: peetäs egä aastak Juhan Jaigi jutussõkõnõlamisõ võigõlust ja Perimüstandsu suurpito, Võro liinan kesk suvvõ viil latsipito ja suvi läbi jutujalutuskäüke. Seo aasta om Võro liinal iin suur juubõlipido – 240. Ku kõgõ pääle kõtt tühäs lätt, sõs peetäs Uma Meki laatu, kost saa suidsusannalihha, sõira ja kamma.
Talina latsõ saiva teedä, kuis prõllatsõl aol võro kiilt opatas ja opitas, määndsid raamatid võro keelen om latsilõ kirotõt ja et koolilatsõ ka esi mõistva kirota ni juttõ ku luulõtuisi. Kiä viil lukõ mõista-ei, saa Helüaida kodolehe päält audioraamatid kullõlda.
Külli, Silvi ja Thea laulsõva viil ”Sa olõt illos Võromaa”
Katrin opas latsilõ selges Sangastõst peri “Kullimängu”, mis näile häste miildü: kuis kull om torsin, et kikas ja kana timä pindremaal oa-herne vällä omma kaknu ja taht näile nüüd kätte massa niimuudu, et kaib auku paa jaos, minkaga vett kiitä… Kull aja kanakõisi takan ja kedä timä kätte saa, tuu saa vahtsõs kullis ja mäng nakkas jälki pääle.
TVS-i puult kinkse Külli latsiaialõ raamadu “Tallinna Võru Selts 30” ja üte suurõ mänguasa. Jana andsõ üle “Piltsõnastu latsile 3” ja pakikõsõ Contra värssega Urvastõ kamma, et latsõ saanu võrokeelitsit sõnnu mano oppi. Oppaja kitsevä, et näil om latsiaian kah uma keelepesä tettü ja et kingis saadu raamadukõnõ pandas sinnä kõigilõ uurmisõs.
Oppaja paistu esi kah suurõ võro keele huvilidse olõvat: nigu mõnõ sõna selges saiva, pruuvsõva õkva kõrraga kõnõlda.
Latsiaia juhataja Jurini Marika tull kogonisti säändse viguridsõ mõttõ pääle, et kirutas mi külänkäügüst luu ja pand tuu võrukiilsenä Haridusammõdi kodolehe pääle üles (www.tallinn.ee/et/haridus). Kae perrä!
Kirja pandnu Orioni Jana
09.04.2024