Vahtsõaastakuu 14. pääväl sai rahva soovil kõrraldõt joulupido, mis vana kallendri perrä jäigi joulukuuhtõ.
Pidopaik oll ammu tuntu, varrampa käütü, kohvik Mustamäe tiil Talleksi majan.
Juhatus võtsõ asja tõsitsõlt ja pido kõrdaminekus naati jo õkva pääle joulukuu suurkoko toimõndama. Matvere Tiit tekk nimekirä, Liini Helbe ja Müürsepä Külli naksi rahha korjama, Soka Ollõv naas kokko säädmä ütidse laulu sõnno, noid manotama ja pillimehe Aija Jaaniga läbi kõnõlõma. Mõtsalligu Eva paksõ vällä mõttõ, et võisi mõistatuisiga rahva vaimu pido aigu herksänä hoita ja naas noid kokko otsma. Müürsepä Külli pidi otsma üllätüsülesastja , Joulumehe „pehmes kõnõlõma“ ja üledse kõrraldusõ iist hää saisma.
Täpsähe kell 14 võtiva 35 pääliina võrokõist tsõõri (Võru om jo rõnga- vai tsõõriliin), kesken juhatusõ liikmõ, kiä sis lämmä glögiga klaase tsõõripiten õgäütega kokko kõlistivä ja hüvvä vahtsõt aastakka suuvsõva. Tsõõrin sai laultus ka mi hümni, Kõivu Inda „Mu latsõpõlvõ Võromaad“.
Sis lugi Plumanni Kaja-Riina ette umatettü ilosa luulõtusõ ja istuti lauda tsiaküdüst ja verivorsti süümä.
Ku keskpaik kimmäs, naksi ladva laulma. Soka Ollõv ütel laulu numbri, Aija Jaan pandsõ süntesaatori „hänna“ saina ja ütislaulõ seriaal läts käümä.
A et vaihõpääl olli üllätüsülesastja peräle jodnud, sis saivaki nä sõnna nii laulu ku pillimänguga.
Pedassaarõ Ele ja Keskpaiga Tiinamai laulõ ilo ja harmoonia pandsõ hinge kinni, nii-et mõnõl jäi süüminegi poolõlõ ja käsi kahvliga pistü. Ülesastja saadiva hinnäst eri pillega. Tiinamail oll karmoška , Ele mängse viiulit ja ukuleelet.
Säändse hingematva etteastõ pääle saa-õs Joulumiiski tulõmata jäiä ja näid kingildä jättä.
Papõrdõga valgõ habõna ja uhkõ punadsõ rüvvüga vana tull kavvõndast, Saarõmaalt, ja kõnõl Valgu Jaanisõ helüga.
Kõik, kiä loosipaki tei, sai hindäle midägi. „Üte pundi“ pakilunastust vidi Raidma Külli, kiä näüdäs ette, määndsit vigurit tulõ tetä, et energia ihon liikma saia. Tõõsõ tei hoolõga perrä. Energia sai nii liikma, et Aija Jaani pilli perrä läts tandsus. Pääle tuu viil ajumängus, ku Mõtsalligu Eva mõistatuisi maaha hõigas.
Üts laulumäng oll viil „Mi läämi rükä lõikama“ viie perrä, a sõnnoga „Mi umma kuuki otsimi…. “ tuuperäst, et egäle pidolidsele oll umanimeline kuuk, mis tull erälde lavva päält tõistõ siäst üles löüdä.
Löüdmisrõõm oll suur ja ku kuuk süüdü ja kohv juudu, minti hüä tujoga rõõmsahe kodotii pääle.
Müürsepä Külli 07.02.2023