Hüä`põlisvõrukõsõ, välisvõrukõsõ ja võrukõisi sõbra`!
Mi olõmi Tallinast ja mi …….toetami tävvega nii võru keele, ku meele, ku Võrumaa alalhoitmist.
Tuu mõtõ om mi Tallina Võru Seldsi põhikirängi seen.
Kõik mi tegemise´ Tallinan tuginõsõ noilõ sõnnulõ.
Seldsi tüükiil om võru kiil. Tiätritrupp Tungõl tege võrukeelitsit näütemängõ, parhillaki om mängukavan Kauksi Ülle tükk „Kolm hinnapakmist“. Ansambli Liiso repertuaar om puhtalt võrukeelinõ. Võru keele kirändüsligun kohvitarõn arotami kõkkõ kah õnnõ uman imäkeelen. Näpotüü tsõõr Nopõnäpo tegelese Võrumaa mustritõga.
Olõmi iholt ja hengelt võrukõsõ, tuu om mi sisemine olõmus.
Mi seldsi ammudsõ liikmõ Mahta-Miljana Proosi sõnnuga ülden:“Las olla tõõsõ tõistõga,
ma olõ sukka, Võrumaa. Siin mina sündü, kasusi ja opsõ kõnõlõmagi….“
Siinkotsil tulõ miilde lugu kooliaost, ku minnu panti nukka koolin võru keele kõnõlõmise peräst.
Säälsaman nukan oll saina pääl suur Lenini pilt ja ma mõtli uma latsõ-aruga, et ei tiiä külh, mis pahandusõga tuu „suur ja üllas Lenin“(nigu meile oll opat) nakkama om saanu`….
A keele manu tagasi ja Mahta Miljana sõnnuga edesi :
“Oll aig, ku häbeneti viil, mi armast, kallist võru kiilt,
tääd peeti halvas murrakus, et om ku keele moonutus.
Ei olõ halvõmb sukugi,
om tõisist keelist parembki,
ka eesti kiil saa arvo tuust
ja lainas sõnnugi mi suust.“
Ku ma ei essü, sis om Ilvese Aapo puult vällä hõigat üts mullõ väega meeleperäne lõugahus: „Kiildke vai är, a ma õks kõnõlõ!“
Lõpõtusõs tenosõna` kongressi kõrraldajatõlõ ja tõisilõ põlisvõrukõisilõ. Teno teile om Võrumaa joba mõnda aigu pidevält meediapildin ja tuu om mõotanu ka mi seldsi liikmide arvu kasvu.
Kukki olõmi tõõsõn Eesti otsan, hoiami umma kallist Võrumaad helläste süämen.
Mi juurõ`olõ-õi parketil!
Müürsepä Külli
20.04.2023