Timahava mahlakuu 22.pääväl oll` Võru Kandlõ saal puupistü rahvast täüs. Laulti EV hümni ja Kõiva Inda kirutõt laulu „Mu latsõpõlvõ Võrumaa“ (mi seldsi hümni).

Kauksi Ülle ütel avasõna` ja sis saiva tervütüses sõnna Allasõ Anti, Epleri Rain, Järvelille Rein, Prozese Jaak, Müürsepä Külli jt.

Mi seldsi puult oll 3 delegaati: Plumanni Kaja-Riina, Raitari Inga ja Müürsepä Külli, kel kõigil saadigumandaat kuhaga täüs. Üttekokko oll saalin 139 delegaati, kiä esindivä piä 2000 inemist.

Edimäne teema oll Hindämäärämine.

Valgu Heiki andsõ väega huvitava aoluulidse ülekaemise võrokõisi kujonõmisõst. Allasõ Tiia kõnõl kirändüsest ku võro hindätiidmise kandjast. Pargi Indrek ja Loode Oliver seletivä, mis võimalusõ omma väikul rahval hinnäst määrädä, kõnõliva põlisrahvidõ deklaratsioonist.

Pääle söögi-joogivaiht tull tõõnõ teema - Võrokõisi üleilmne ja põlvkundõvaihõlinõ kuuntüü.

Keelest, haridusõst ja noorist kõnõl Jüvä Sullõv, kiä ka mi rahvalõ om keeleoppust tennü.

Rahmani Jani ja Vaaba Janeki jutt oll võru keelest meediän. Võrumaa Arenduskeskusõ puult tull kõnepulti Toodsi Tiit. Pulga Jaani teemas oll võrukõisi võimalusõ maa täütmisel luuduslatsiga.

Kolmas teema - Keskkunna, kogokunna ja kultuuri köüdüs. Timmo Margus andsõ teedä, kuis Võrumaa kooli` saava järjest inämp umamaist  puhast süüki. Mõistligust mõtsamajandusõst kogokunna ja kultuuriga rehkenden kostu mõtsamehe ja Võru Instituudi direktori Kuuba Raineri suust. Ku kõnepulti astsõ MTÜ Meie Nursipalu miis Robert Sinimäe, läts saalin tulitsõs, nii-et pääle timä sõnna võtnu Allasõ Antil tull uma jutuga „aur vällä laskõ“ ja tä sai tuuga kenäste nakkama.

Ega teema hääletedi erälde. Hääletä saiva õnnõ delegaadi`.

Edimäne teema Hindämäärämine sai 1 vastahelü ja 4 eräpoolikut.

Tõõnõ teema - Kiil, haridus ja meedia sai 1 eräpooliku helü

Kolmas - Elämise jaos hää keskkund sai 1 eräpooliku helü pääle üte parandusettepaneku sisseviimist.

Kongressi vanõmbide kogo  liikmidõ kandidaatõ oll 19, kellest vällä valiti 11. Mi seldsi puult sai sinnä valitus Raitari Inga, kiä om aokiräniku haridusõga ja mõist hüäste õigõ asa iist saista ka meedian. Vanõmbide kogo hulgast valiti päävanõmb, kelles sai Kauksi Ülle. Timä asõtäütjas Kuuba Rainer.

Pääle kongressi minti Tamula viirde ütstõõsõl käest kinni hoitma ja Nursipalu ketti tegemä. Umbõs 500 inemist võidsõ olla. Oll ka egäsugutsit eestikiilsit plakatit, a ainumas võrukeeline oll mi seldsi puult,

Kaja–Riina tettü kiri linadsõ kanga pääl „Esämaa ja imäkiil, kavva-kavva kestku viil“

Edesi läts rahvahulk müüdä rannapromenaati üle silla Roosisaarõlõ, kon alas kontsert, mis  kestse kellä 18-23-ni. Oll lauljit ja pillimehi üle terve Eesti, a kontserdi tipphetk oll, ku selgide taivatähti ja kuusirbi  all Mäe Tõnis laulsõ „Koitu“.

Võrukõsõ olli hinnäst põlisrahvas kuulutanu!

 

 Müürsepä Külli